Plantun de Prouvènço

Pèr coumpara dos planto d'encò nostre

Phyla nodiflora & Vicia angustifolia

Phyla nodiflora

Verbenaceae

Noms en français : Phyla à fleurs nodales, Verveine nodulaire.

Descripcioun :
Planto gazounanto que rebalo au sòu, que nous vèn d'Americo dóu miejour (pèr li jardin). Pamens s'escapo e pòu alor curbi de gràndi surfàci proun rapidamen, pèr acò es uno planto envahissènto. Se recounèis à si flour blanco, un pau roso, en tèsto, e à si fueio (8 à 30 mm) óupousado virado devers lou aut e pelouso dessouto.

Usanço :
Dins d'ùni païs li fueio sèrvon coume tè. La planto èi vertuouso contro li fèbre, lou raumas e lou tussi (jus de la planto), contro li vèrme (ankilostome). La racino èi bono contro lou mau d'estoumac. Èi peréu uno planto diuretico.

Port : Erbo
Taio : 10 à 20 cm
Fueio : óupousado
Tipe bioulougico : Emicriptoufite
Cicle bioulougico : Planto renadivo

Gènre : Phyla
Famiho : Verbenaceae

Coulour de la flour : Roso
Petalo : irreguliero
Ø (o loungour) flour : 3 à 4 mm
Flourido : Printèms - Estiéu - Autouno

Sòu : Ca
Autour basso e auto : Pancaro entresigna
Aparado : Noun
Remarco : Planto envahissènto
Jun à óutobre

Liò : Tepiero bagnado - Prado umido - Camin - Escoumbre e proche dis oustau
Estànci : Termoumediterran à Mesoumediterran
Couroulougi : Óurigino Americo-Sud
Ref. sc. : Phyla nodiflora (L.) Greene, 1899 (= Lippia filiformis (Schrad.) Meikle, 1985 )

Vesso(-di-fuioun-estré)

Vicia angustifolia

Fabaceae Leguminosae

Nom en français : Vesce à feuilles étroites.

Descripcioun :
Aquesto vesso, proche de Vicia sativa, trachis dins li relarg séusous de Prouvènço. Se destrìo de la vesso cultivado que li fueioun soun proun estré, subretout aquéli d'en aut de la planto. La flour èi bèn acoulourido peréu.

Usanço :
La flour èi manjadisso, mai coume pèr li jaisso, èi pas counseia de manja de grano de vesso, que soun empouisounanto e dounon uno malautié néuroulougico, lou latirisme (presènci d'ODAP).